Contoh geguritan bahasa Jawa

Contoh Geguritan

Pahlawanku

(R. Tantiningsih)

Pahlawanku  
Wutahing ludirmu

Nyiram ibu pertiwi

Nadyan sang ibu

Kudu muwun sedhih

Karajang-rajang manahe

Karujit-rujit rasa pangrasane

Pahlawanku

Mugya Gusti paring nugraha

Semana gedhene bektimu

Jiwa raga, bandha donya

Tanpa sisa

Amung siji pangajabmu

Merdika

Segara Aru

(Hisyam Z)

Bener, pener, yekti

Sliramu dadi seksi

Seksi pahlawan sejati

Pahlawan mulih aran awit bekti

Awit mangku jejibahan

Tugas luhur, jujur ing palagan

Ngemban amanat Trikora ayahan

Segara Aru biru lugu blak-blakan

Ngemu madu

Maduning bangsa satuhu

Kang Asma Yos Sudarso iku

Korban jiwa raga ing Segara Aru

Ludira kang wekasan

Kanggo nebus Irian

Yos Sudarso gugur kalayan

Asmanya misuwur ing bebrayan

Sliramu Aru

Seksi lugu

Seksi bisu

Satuhu baku

Merapi

(Puthu Aryana)

Merapi...

Saka kadohan katon gagah

Asep putih ndedel ing awiyat

Tilas dalan lahar katon cetha

Kena sunare Hyang Bagaskara

Merapi...

Saumpama kowe bisa crita

Kabeh kadadean ing tanah Jawa

Wiwit jaman Mataram Kuna

Nganti madege Kraton Ngayogyakarta

Merapi...

Sliramu anyekseni kridhaning bangsa

Wiwit nalika ngusir penjajah Walanda

Jaman mardika jaman Soekarno

Nganti jaman Soeharto

Jaman Habibie tumekaning Megawati lan Susilo

Merapi dadi saksi

Kembang Mlathi

(R. Widiyati)

Daksebar kembang mlathi

Ing Taman Makam Pahlawan

Kusuma Bangsa kang sejati

Luhku tumetes... tes... netesi bumi

Aku rumangsa dosa

Durung bisa melu labuh negara

Amung sekar mlathi iki

Tandha setya lan janji

Bakal melu napak suci

Labuh nagri alelandhesan ati suci

Dadi pepenget Agustus iki dina mulya lan suci

Api Abadi Mrapen

(R. Tantiningsih)

Latu kuwi, tansah murub

Ora nggubris kiwa tengene

Nadyan digrujug tirta

Nadyan maruta padha teka

Nanging latu kuwi ora surut

Latu kuwi, tansah murub

Kaya latu kang ana jero ati

Angel dipateni lan angel diadhemake

Latu kuwi, tansah murub

Ing mrapen dununge

Ninggal sejarah

Kanggo anak putu

Kitir

(Sumono Sandy Asmon)

Kitir iki

Isi panantangku marang wengi

Sing kebacut anggone nguja sepi

Dolanan swarane asu baung nggeririsi

Kitir iki

Wujud pangundhamanaku marang awang-awang

Sing kebacut brangasan

Ngrentengi lintang, nguntal rembulan

Kitir iki

Srana gugatku marang isen-isening jagad

Sing pijer royokan brekat

Tan keguh njaluk ruwat

Koran

(Harum Sunya Iswara)

Taktunggu tekamu

Saben dina ing omahku

Kabar kang daktunggu

Saka awakmu

Nambahi wawasanku

Mosak-masike donya

Maju mundure negara

Minangka warta

Koran minangka alat komunikasi

Kang kudu diwerdi

Mula ora ketinggalan informasi

Wutah Getihku

(Mahardono Wuryantoro)

Gumelar jembar bumi asri

Sumunar sumringah sunare bagaskara

Padhang sumilak hanelai jagad Nuswantara

Bumi pusaka wus kawentar

Ombak-ombak samodra, kencana kang ngrenggani

Wutah getihku daktresnani

Kawulamu....

Guyub rukun anambut kardi

Jeroning swasana tentrem lan mardika

Gilig ing tekad manunggal

Cumithak jeroning ati, bebarengan ambangun

Aku lila....

Korban jiwa raga kanggo bumiku

Nadyan awak ajur dadi sawur

Lan getihku mblabar mili, netes ing bumi pertiwi

Labet raharjaning nagara

Lumantar iki....

Isining atiku ginurit

Prasetyaku thukul saka ati kang tulus

Njaga langgenging kamardikan

Donga pujiku kebak kaendahan, kanggo wutah getihku

IBU

Ibu,
Meningi donya kang sangsaya tuwa,
sliramu panggah mesem ngujiwat,
jroning duhkita sing pait kasangsaya,
sliramu panggah santosa ing budi...

Ibu,
sliramu iku jati dhiri manusa prakosa,
sing tansah nggantha lan nglari panguripan,
datan ngrasa kasayahen lan kamomotan,
tansah asung jurung pamuji,
mring jiwa-jiwa kang rengka,
tansah paring winihing katresnan,
setya nepusi dina lan sasi,
dene lungiting angin lan samudramu,
ngimbuhi greget prauku lelayaran,
ngupadi tentreming ati,
ing sangkan paraning dumadi...

Ibu...
niyat ati namung hatur sembah bekti,
nyuwun donga kagem ingkang putra, Dedy...

I LOVE YOU EMAK

Mbok ...
Sak jerone mesem mu ono keselmu
Rino wengi kerjo tanpo leren..
Babar pisan ora sambat opo opo
Kabeh mau , kanggo butuhe omah..

Mbok...
Gunung paido karo omelan bendino
Songko telat sarapan , teko masalah ngumbah sandangan
Mbok tetap sabar lan telaten...
Tetep masak, tetep umbah-umbah , tetep nyapu jogan..

Mbok...
Tetap sabar naliko telat duit belonjo..
Tetap ngapuro naliko duit spp tak gondol lungo
Tetap ngobati naliko aku loro...
Tetap wani ngedapi perkoro naliko aku lumpuh tanpa doyo...

Mbok....
Saiki aku wis gede...
Wis iso mergawe... golek duit dewe...
Iso tuku sandang penganggo dewe...
Kabeh tak nggo senengku dewe...

Mbok...
Naliko aku gajian , sering aku lali...
Mboku nang deso , kabare koyo opo...
Sehat opo ora, bature sopo lan liya liyane...

Mbok....
Yen aku kelingan kangelanmu...
Naliko ngopeni cilikanku...
Wani madu naliko mbok nasehati...
Wani ngelaraki ati naliko mbok kandani...
Aku getun....ora karuan....

Mbok ...
Sepurane sing akeh....
Aku ga iso mbales opo-opo...
Mung iso dungo....
Mugo mbok di wenehi urip sing adem ayem tentrem
Sehat wal afiat tanpo ono alangan opo-opo...

Amin......

Guru

Ing papan iki aku ngenteni

sliramu sing tak kurmati

ora lali

aku saka ngomah wis nganggo minyak wangi

Guru

awakmu pancen pantes digugu lan ditiru

lakumu ora kesusu

isa gawe tuladha  kanggo awakku

Gunemanmu alus ngandhut ilmu

aku ning kene mung iso tiru-tiru

amarga sliramu sugih ilmu

Matur nuwun guru

panjenengan ora wegah ndidik aku

marai aku ben nduweni kepinteran

sliramu ndidik aku ben iso sopan

Pamulangan

Jare simbah aku kudu sekolah
Kareben dadi bocah genah mrenah ora nggladrah

Jare rama ibu aku kudu sregep mangkat
Kareben dadi wong pangkat urip ora kesrakat mlarat

Jare bapak ibu guru aku kudu sinau
Tambah ilmu
Kareben kelakon kabeh kang tinuju

Nanging
prakanca, ….

coba delengen kahanan  nyata
apa isih bisa pamulangan kang ana dadekake urip  tumata
pamulangan kang tanpa tuladha
pamulangan kang kasatan piwulang
pamulangan kang ngajarake angka-angka wuta
siji lan siji ana pira?
Jare anut kang duwe kersa
Jan ora weruh subasita, trapsila, apa maneh tata krama
lali dosa…
kabeh lurung binarung kumalungkung
pamrih pamuji siji
Pamulangan ora aweh pepadang
Simbah,
Nyuwun pangapunten
Kula mboten kepingin dados dokter
Jalaran duite bapak mboten wonten sakoper

Rama,
Nyadong duka
Kulo mboten kapilut drajat pangkat
Jalaran ajrih sumpahing rakyat
Kang panggah mlarat sekarat

Bapak ibu guru,
Nyuwun donga pangestu
Mugi-mugi sedaya ilmu saged dados sangu

Sekolahku

Sekolahku…

Rupamu saiki duduk sekolah maneh

Nanging kowe saiki arupa panggonan kang rusuh

Kelas, pekarangan, pada karo kandange petek

                                Sekolahku…

                                Keadaanmu mulai bien ora berubah-berubah

                                Sampa-sampah sing kleleran tetep ora bisa di berantas

                                Kapan keadaanmu iso berubah…nasib…nasib…

Saiki sopo sing bisa di salahake…??

Tukang nyapu-nyapu wis di kerjo professional banget

Clotehan guru wis bekbanget ditokno

Lek ngno murid-e sing salah, ora bisa taat marang aturan

                                Jadwal wis digawekno lan ditempel ndek kelas

                                Kanggo murid supaya ngelasanakno tugas piket_e

                                Ora kanggo pajangan para cecek sing mrambat ndek tembok

                                Amarga iku laksanakno tugase dewe-dewe

Arepan sekolah,Arepan ku pisan

Resik, Enak kanggo belajar…

Murid-murid akeh sing berprestasi…

Kabeh iku arep-arepane sekolah
 

                                Resik sekolahku

                                Enak belajarku

                                Konsen belajarku

                                Podo moro prestasine.

IBU
dening Yossanti

Tresna asih ibu
Ora ana kang bisa ngganteke
Kesabaran ibu kang kebak wutuh
Ora bisa daklaleke

Do’a ibu kang tulus
tansah ngiringi awakku
pengorbanane kang tanpa wates
ora bisa winales

Ibu . . .
pituturmu bakal dakrungu
tresna asihmu marang aku
ora bakal puput
Pandongaku ibu…
Muga Gusti tansah nyembadani

IBU

Saka lemah pangulandaran kene

Anakmu kirim layang

Nyuwun donga pangestu

Bakal methik kembang

Susumping sotya

Bakal lungguh dhampar kencana

Linambaran babut sutra

Ibu

Kanthi dlancang seta kiyi

Anakmu ngantu rawuhmu

Ngasta sasuwek pangapura

Pinangka nambal kaluputan

Anakmu kang wus kesupen

Sega thiwul sambel korek ndesa

Dangdangane ibu sewengimuput

Datan sare kanggo aku

Biyen kae

Ibu

Estu dakantu rawuhmu

Ing dina pahargyan tembe

Nyuwun uga ibu ngasta

Sega thiwul sambel sagodhan

Binungkus godhong gedang

Anakmu kangen